Aengus Ó Snodaigh (Dublin South Central, Sinn Fein)
Link to this: Individually | In context | Oireachtas source

26. To ask the Minister for Culture, Heritage and the Gaeltacht an ndearna sí aon ghníomh nó iarracht, mar an tAire freagrach as cur chun cinn na Gaeilge, in aghaidh an maolú nua a chinn Parlaimint na hEorpa maidir le seirbhísí ateangaireachta i nGaeilge glactha i mí an Mhárta, an ndearna sí teagmháil leis an bParlaiminte Eorpach nó leis an Aire Gnóthaí Eachtracha chun stádas na Gaeilge san institiúid agus na himpleachtaí don phobal teanga a phlé; agus an ndéanfaidh sí ráiteas ina thaobh. [24338/24]

Thomas Byrne (Meath East, Fianna Fail)
Link to this: Individually | In context | Oireachtas source

Tá mo Roinn ar an eolas faoin dúshlán a bhaineann le seirbhísí ateangaireachta a chur ar fáil trí Ghaeilge i bParlaimint na hEorpa agus go deimhin in institiúidí eile san Aontas Eorpach agus anseo in Éirinn. Tá mo Roinnse gníomhach agus obair leanúnach ar siúl againn chun an t-easnamh seo a chur ina cheart.

Ar an gcéad dul síos, cuireann mo Roinnse maoiniú ar fáil faoin Tionscnamh Ardscileanna Gaeilge don MA san Ateangaireacht Chomhdhála in Ollscoil na Gaillimhe. Is é seo an t-aon chlár ateangaireachta comhdhála in Éirinn agus an t-aon chúrsa ateangaireachta ar domhan ina gcuirtear oiliúint ateangaireachta sa Ghaeilge ar fáil. Maoiniú de €209,000 in aghaidh na bliana atá á chur ar fáil ag mo Roinnse don chúrsa seo.

Chomh maith leis sin, rinne mo Roinn cómhaoiniú caipitil le déanaí ar áiseanna úrnua oiliúna don ateangaireacht chomhdhála atá lonnaithe in Ollscoil na Gaillimhe, rud a chuireann eispéireas foghlama iomlán tumthach ar fáil do mhic léinn an chláir máistreachta sin lena chinntiú go bhfuil siad ullmhaithe chomh maith agus is féidir leo a bheith chun glacadh le poist i réimse na hateangaireachta tar éis dóibh an cúrsa a chríochnú.

Ina theannta sin, maoiníonn mo Roinn scéim intéirneachta d’ateangairí agus, sa chéad bhabhta den scéim sin, chaith triúr céimí ateangaireachta le Gaeilge sé mhí ag obair le hArd-Stiúrthóireacht na hAteangaireachta sa Choimisiún Eorpach anuraidh, ag fáil taithí ar an ateangaireacht. D’éirigh go han-mhaith leis an scéim seo agus fuair beirt as an triúr fostaíocht leis an gCoimisiún tar éis na tréimhse intéirneachta.

Tá rún ag mo Roinn an scéim seo a leathnú agus an deis a thabhairt d’institiúidí eile –Parlaimint na hEorpa ina measc – a bheith páirteach sa scéim seo le súil is go mbeidh rannpháirtíocht láidir sa scéim sna blianta amach anseo.

Tá cainteanna ar siúl ag mo Roinn freisin le Cúirt Bhreithiúnais an Aontais Eorpaigh agus le Seirbhís Thithe an Oireachtais anseo in Éirinn chun tuilleadh deiseanna le haghaidh intéirneachtaí ateangaireachta leis na heagraíochtaí sin a fhiosrú.

Anuas air sin ar fad, beidh an seimineár bliantúil ar dheiseanna gairme san AE á reáchtáil ag mo Roinnse i gcomhar leis an gCoimisiún Eorpach ag Oireachtas na Samhna i gCill Airne arís i mbliana. Dírítear sa seimineár sin, ag an bhféile Ghaeilge is mó sa tír, ar na deiseanna fostaíochta atá ar fáil dóibh siúd a bhfuil ardchaighdeán Gaeilge acu in institiúidí an AE a chur ar a súile do na daoine sin. Tá sé beartaithe ceardlann ar an ateangaireacht a reáchtáil faoi scáth an tseimineáir seo i mbliana.

Leanfaidh mo Roinn leis na hiarrachtaí seo chun cur leis an teacht ar ateangairí cáilithe mar atá déanta go rathúil le haistritheoirí, le léitheoirí profaí agus le dlítheangeolaithe i scéimeanna roimhe seo. Ach na beartais seo a bheith curtha i bhfeidhm ar bhonn fhadthéarmach, is é tuairim mheáite mo Roinne go mbeidh dóthain ateangairí ar fáil le freastal ar riachtannais na Parlaiminte amach anseo.