Catherine Connolly (Galway West, Independent) | Oireachtas source

Tá fáilte roimh na finnéithe ó Chomhdháil Oileán na hÉireann, Gaeloideachas agus na ETBs. Tá mise fós ag caint faoi na VECs. Maith dom é sin. Beidh mé ag teacht ar ais le ceisteanna géara ach tá ard-mheas agam ar an gcóras oideachas. Níl mé sásta beag ná mór leis an méid atá tarlaithe anseo. Fáilte ar ais go Bláthnaid Ní Ghréacháin agus Dónal Ó hAiniféin. Is dóigh go raibh Chloe Ní Mháille anseo freisin. Ní raibh Pádraig Ó Foghlú anseo cheana. Fáilte roimhe siúd as Inis Meáin.

Is dócha gur baineadh stangadh asam agus go leor daoine nuair a chualamar faoin gceapachán. Bhí duine gan Ghaeilge le bheith ceaptha. D'iarr mé ar an gCathaoirleach é a chur ar an gclár oibre agus is maith an rud é go bhfuil na finnéithe anseo agus an cheist ardaithe anois. Is léir go bhfuil frustrachas, fearg agus díomá ar Ghaeloideachas, ar Chomhdháil Oileán na hÉireann agus ar a lán daoine eile.

Níl mé sásta. Tá meas agam ar David Leahy agus ar a chuid oibre ach tá sé tagtha anseo gan ráiteas tosaigh agus gan aon rud i nGaeilge. Níl sé sin pearsanta. D'fhreastail mé ar chruinnithe leis go minic ach cuireann sé díomá ollmhór orm go bhfuil a phreasráiteas i mBéarla agus nach bhfuil aon rud i nGaeilge. Ag dul ar ais go dtí Gaeloideachas agus an rud a dúirt sé, an fáth go bhfuil sé seo riachtanach ná go bhfuil tionchar díreach agus indíreach ar nósmhaireacht, cur chuige agus meon bainistíochta eagraíochta agus scoile. Tá tionchar díreach aige ar meon, cumas agus cur chuige na scoláirí. Aontaím leis sin. Cén chaoi gur féidir le David Leahy a rá go bhfuil sé sásta duine a cheapadh gan focal Gaeilge? Cé mhéad scoileanna lán-Ghaeilge a thagann faoi chúram David Leahy?