Aengus Ó Snodaigh (Dublin South Central, Sinn Fein) | Oireachtas source

Níl mé chun a thuilleadh moille a chur ar an Aire Stáit muna bhfuil aon cheist eile. Ní fheicim lámh in airde. É sin ráite, is féidir linn déileáil le seo. Go hoifigiúil, is gá dom cúpla rud a rá.

De réir Bhuan-Ordaithe 215A, tá sé de dhualgas ag an roghchoiste seo tuarascáil a ullmhú mar chuid dá mbreithniú ar na Meastacháin a bhí idir lámha againn inniu agus go leagfar an breithniú seo faoi bhráid Dáil Éireann taobh istigh de 14 lá. Is chuige sin a iarrann an Roghchoiste um Formhaoirsiú Buiséid agus rúnaíocht na gcoistí ar gach roghchoiste de chuid na Dála go bhfuil cúram na Meastachán aige agus a bhfuil athbhreithniú ar na Meastacháin Athbhreithnithe déanta aige tuarascáil ghairid ar an bpróiseas a bhaineann leis agus a tuairimí ar an bpróiseas sin a ullmhú agus a leagan faoi bhráid Dháil Éireann. Molaim go smaoineodh gach comhalta den roghchoiste ar an ábhar seo agus go seolfadh siad a gcuid tuairimí agus moltaí ar aghaidh chuig cléireach an choiste. Má fhaightear dóthain tuairimí, beimid in ann tuarascáil a ullmhú. Nuair a chuireann an cléireach dréacht-tuarascáil le chéile ar an mbreithniú seo, iarrfar ar chomhaltaí an roghchoiste í a chomhaontú i seisiún príobháideach agus go leagfar í faoi bhráid Dáil Éireann roimh an 25 Feabhra.

Gabhaim buíochas leis an Aire Stáit, an Teachta O’Donovan, chomh maith le hoifigigh na Roinne as an gcúnamh a thug siad dúinn - dom ar aon chaoi - inniu. Cuireann sé sin críoch lenár ngnó. Aontaítear go gcuirfear na tuarascála sin le chéile agus go gcuirfimid an cruinniú ar athló. Tá an cruinniú seo críochnaithe. Go raibh míle maith agaibh.